केद्रीय गृह मंत्रालयाच्या वतीने उल्लेखनीय कामगिरीबद्दल दिले जाणारे 'राष्ट्रपती पोलीस गुणवत्ता सेवा पदक' सन्मानीत तुर्भे वाहतुक पोलीस विभागाचे पोलीस निरीक्षक श्री. किसन गायकवाड तसेच 17 जानेवारी ते 3 फेब्रुवारी या कालावधीत 3 खाड्या पोहण्याचा विक्रम करणारा साहसी जलतरणपटू कु. तन्मय महेंद्र सुतार यांस नवी मुंबई महानगरपालिकेच्या सर्वसाधारण सभेप्रसंगी महापौर श्री. जयवंत सुतार यांच्या शुभहस्ते सन्मानीत करण्यात आले.
याप्रसंगी उपमहापौर श्रीम. मंदाकिनी म्हात्रे, महापालिका आयुक्त श्री. अण्णासाहेब मिसाळ, स्थायी समितीचे सभापती श्री. नविन गवते, सभागृह नेते श्री. रविंद्र इथापे, विरोधी पक्षनेते श्री. विजय चौगुले, क्रीडा समितीचे सभापती डॉ. जयाजी नाथ, शिवसेना पक्षप्रतोद श्री. व्दारकानाथ भोईर, भारतीय राष्ट्रीय काँग्रेस पक्षप्रतोद श्री. अविनाश लाड, नगरसेवक श्री. शिवराम पाटील आदी मान्यवर उपस्थित होते.
नवी मुंबई पोलीस आयुक्तालय क्षेत्रात तुर्भे वाहतुक पोलीस विभागाचे पोलीस निरीक्षक श्री. किसन गायकवाड यांनी कायदा व सुव्यवस्थेचे रक्षण करताना बजावलेल्या कार्यतत्पर सेवेबद्दल लाभलेल्या राष्ट्रीय सन्मानाबद्दल पोलीस दलाचीच नव्हे तर नवी मुंबई शहराची मानही उंचावलेली आहे असा विशेष उल्लेख करीत महापालिका सभागृहाच्या वतीने अभिनंदन करण्यात आले.
तसेच 17 जानेवारी 2020 रोजी एलिफंटा ते गेट वे ऑफ इंडिया हे 12 किमी अंतर, 31 जानेवारी 2020 रेजी धरमतर ते रेवस हे 18 किमी अंतर तसेच 3 फेब्रुवारी 2020 रोजी करंजा पोर्टमांडवा बीच हे 9 किमी अंतर पार करणारा साहसी जलतरणपटू कु. तन्मय महेंद्र सुतार यांनी केलेल्या यशस्वी कामगिरीबद्दल त्यांना सभागृहाच्या वतीने सन्मानीत करण्यात आले.
