पनवेल : पनवेल महानगरपालिका क्षेत्रात दि.24 जून रोजी तब्बल 95 कोरोना रुग्णाची वाढ झाली असून वाढती रुग्णसंख्या कमी होण्याच्या दृष्टिकोनातुन पुन्हा किमान 8 दिवस अत्यावश्यक सेवा वगळता संपूर्ण लॉकडॉऊन करण्यात यावे अशी मागणी विरोधी पक्षनेता प्रितम म्हात्रे यांनी पालिका आयुक्तांना पत्र मेल द्वारे पाठवून मागणी केली आहे. रायगडच्या पालकमंत्री अदिती तटकरे यांच्याकडे देखील प्रीतम म्हात्रे यांनी पनवेल महापालिका क्षेत्रात लॉकडाऊन करण्याची मागणी केलेली आहे.
पनवेल महानगरपालिका हद्दीत दिवसेंदिवस कोरोनाचा कहर वाढत चाललेला दिसून येत आहे. दररोज जवळपास शंभर नागरिक कोरोनाग्रस्त आढळून येत आहेत. त्यामुळे पनवेल महानगरपालिका हद्दीत महापालिकेच्या वतीने लॉकडाऊन करण्यात यावे अशी मागणी पालिकेचे विरोधी पक्षनेते प्रितम म्हात्रे यांनी आयुक्तांकडे केली आहे. दिवसागणिक पनवेल महानगरपालिका हद्दीत कोरोनाचे रुग्ण अधिक सापडू लागले आहेत. त्यामुळे भयावह स्थिती निर्माण झालेली आहे. मार्केटमध्ये नागरिक मोठ्या प्रमाणात खरेदीसाठी घराबाहेर पडताना दिसत आहेत. त्यामुळे बाजारात मोठी गर्दी होत आहे तसेच वाहनांची देखील वर्दळ वाढलेली असल्याने वाहतूक कोंडी सतावू लागली आहे. विविध ठिकाणी नागरिक मोठ्या प्रमाणात गर्दी करत असल्याने कोरोनाचा संसर्ग वाढू लागलेला आहे. त्यामुळे महानगरपालिका हद्दीतील कोरोना पेशंटची संख्या मोठ्या प्रमाणात वाढत आहे. लॉकडाऊनच्या काळात रुग्णांची संख्या २० ते २५ च्या घरात होती. मात्र लॉकडाऊन शिथिल झाल्यानंतर ग्रामीण आणि शहरी भागात झपाट्याने कोरोना रुग्णांची संख्या वाढत गेली. याला कुठेतरी आळा बसावा व कोरोना रुग्णांची साखळी तुटावी यासाठी पनवेल महानगरपालिकेने आठ दिवसांसाठी अत्यावश्यक सेवा वगळता संपूर्ण लॉकडाऊन करण्याची मागणी पनवेल महानगरपालिकेचे विरोधी पक्षनेते प्रितम म्हात्रे यांनी पालिका आयुक्त सुधाकर देशमुख यांच्याकडे मेलद्वारे केलेली आहे.
नागरिकांचे हित लक्षात घेता व कोरोना रुग्णांची वाढती संख्या लक्षात घेता पनवेल महानगरपालिका हद्दीत आठ दिवसांसाठी लॉकडाऊन करणे आवश्यक आहे. -प्रितम म्हात्रे, विरोधी पक्षनेते, पनवेल महानगरपालिका
