नवीन शेवा व हनुमान कोळीवाडा या गावचे पुनर्वसन साठी माजी आमदार मनोहरशेठ भोईर यांचे मुख्यमंत्री यांच्याकडे साकडे.
उरण दि २६(विट्ठल ममताबादे)उरण तालुक्यातील मुळ शेवा व कोळीवाडा ही दोन्ही गावे जे.एन.पी.टी. बंदराच्या प्रकल्पासाठी १९८६ साली विस्थापित केली असून महाराष्ट्र शासनाने कोकण आयुक्त व जिल्हाअधिकारी रायगड यांच्या मार्फत दोन्ही गावांचे पुनर्वसन केले. नवीन शेवा गावाचे पुनर्वसन बोकडविरा गावाजवळ केले व हनुमान कोळीवाडा गावाचे पुनर्वसन बोरी-पाखाडी या ठिकाणी केले. आजपर्यंत ३४ वर्षात सतत जिल्हाधिकारी, कोकण आयुक्त, जे.एन.पी.टी. चेअरमन यांच्याकडे अनेकवेळा पत्रव्यवहार, आंदोलने-उपोषणे केलेले आहेत. तरी सुद्धा या दोन्ही गावांचा पुनर्वसानाचा प्रश्न सुटला नाही.वर्षानुवर्षे ही महत्वाची समस्या प्रलंबितच आहे.शेवटी माजी आमदार मनोहरशेठ भोईर यांनी स्वतः जातीने लक्ष घालत,स्वतः पुढाकार घेवून महाराष्ट्र राज्याचे मान.मुख्यमंत्री उद्धवजी ठाकरे , व मान.उपमुख्यमंत्री अजितदादा पवार व संबधित खात्यांचे मंत्री व अधिकारी यांच्याकडे सदर प्रश्न मार्गी लावण्यासाठी पत्राद्वारे साकडे घातले आहे.त्यामुळे लवकरच मंत्रालयात या प्रश्नावर बैठक बोलाविण्यात येईल असे संबधित विभागाकडून कळविण्यात आले आहे.आमदार मनोहर भोईर यांनी केलेल्या पत्रव्यवहारमुळे आता हा प्रश्न सुटेल अशी आशा नवीन शेवा व हनुमान कोळीवाडा गावातील ग्रामस्थांनी व्यक्त केले आहे.
